Tanzania na Oman kuimarisha uhusiano kupitia habari na utamaduni, TEF yataka kalamu kuendelea kuunganisha pande zote

NA GODFREY NNKO

UHUSIANO wa kihistoria, kijamii, kitamaduni na kidiplomasia kati ya Tanzania na Usultani wa Oman umeendelea kuimarika, huku sekta ya habari ikitajwa kuwa nyenzo muhimu ya kuunganisha wananchi wa nchi hizo mbili na kuhifadhi historia ya pamoja iliyojengwa kwa karne nyingi.

Balozi wa Usultani wa Oman katika Jamhuri ya Muungano wa Tanzania, Mheshimiwa Saudi bin Hilal Al-Shidhan amesema, kuimarishwa kwa ushirikiano katika sekta ya habari na utamaduni kunatoa fursa muhimu ya kuwakutanisha wadau wa nchi hizo mbili, kubadilishana uzoefu na kuendeleza uhusiano uliopo.

Ameyasema hayo leo Oktoba 1, 2026 jijini Dar es Salaam wakati akizungumza katika kongamano na mkutano uliowakutanisha wahariri na waandishi wa habari kutoka Oman na Tanzania.

Ujumbe wa wanahabari kutoka Oman chini ya Chama cha Waandishi wa Habari wa Oman, uko nchini Tanzania kwa ziara maalum inayolenga kubadilishana uzoefu wa kitaaluma, kujenga mahusiano na kuimarisha ushirikiano wa kimkakati kati ya vyombo vya habari vya nchi hizo mbili.

Akizungumza katika mkutano huo uliohusisha viongozi, mabalozi na wadau mbalimbali, Balozi Al-Shidhan amesema, Tanzania na Oman zina historia ndefu inayounganisha wananchi wake katika nyanja mbalimbali ikiwemo lugha, utamaduni, biashara na mahusiano ya kijamii.

Amesema,urafiki huo unaonekana pia kupitia matumizi ya lugha ya Kiswahili na Kiarabu, ambazo kwa muda mrefu zimekuwa miongoni mwa nyenzo zinazowaunganisha wananchi wa pande hizo mbili.

Balozi Al-Shidhan amesema, ni jambo la kufurahisha kuona kwamba baadhi ya viongozi na wananchi wa Oman wanaweza kuzungumza Kiswahili kwa ufasaha, ikiwa ni ishara ya ukaribu wa kihistoria na kitamaduni uliopo kati ya Oman na Afrika Mashariki.

Amesema, hali hiyo pia huwafanya wananchi wa nchi hizo kujisikia kuwa karibu na wenzao wanapotembeleana, kutokana na mwingiliano wa muda mrefu uliozalisha uhusiano wa kijamii na kiutamaduni.

Balozi huyo amesema, sekta ya habari ina nafasi kubwa katika kuendeleza uhusiano huo, hasa katika kipindi ambacho teknolojia za mawasiliano na mitandao ya kijamii zimebadili kwa kiasi kikubwa namna wananchi wanavyopata na kusambaza taarifa.

Amesema,kuongezeka kwa upatikanaji wa habari kupitia teknolojia za kidijitali kunatoa fursa kwa wanahabari wa Tanzania na Oman kubadilishana maarifa, uzoefu na mbinu za kitaaluma, huku wakitumia vyombo vya habari kujenga uelewa wa pamoja kuhusu historia na maisha ya wananchi wa nchi hizo.

Balozi Al-Shidhan pia ametoa shukrani kwa Rais wa Jamhuri ya Muungano wa Tanzania, Dk. Samia Suluhu Hassan pamoja na Serikali ya Oman kwa kuendelea kuunga mkono taasisi na mipango inayolenga kuimarisha mahusiano kati ya nchi hizo mbili.

Wanahabari Oman

Kwa upande wake, Mwenyekiti wa Chama cha Waandishi wa Habari wa Oman (OJA), Dkt. Mohamed bin Mubarak Al Araimi amesema, uhusiano kati ya Oman na Tanzania hauishii katika historia ya kidiplomasia pekee, bali umejengwa kwa misingi ya watu, utamaduni, lugha na kumbukumbu za pamoja zilizodumu kwa karne nyingi.

Amesema, historia hiyo haipaswi kuonekana kama jambo lililohifadhiwa kwenye vitabu pekee, bali inaendelea kuonekana katika miji, mila, desturi na lugha ambazo zimekuwa sehemu ya maisha ya wananchi wa pande zote mbili.

Dkt.Al Araimi amesema, Bahari ya Hindi, ambayo kwa muda mrefu imekuwa ikitenganisha kijiografia Tanzania na Oman, kwa upande mwingine imekuwa kiungo muhimu kilichowezesha mawasiliano, biashara, usafirishaji na mwingiliano wa watu.

Amesema,safari za mabaharia na wafanyabiashara kutoka Oman kuja Afrika Mashariki hazikubeba bidhaa pekee, bali pia zilisafirisha lugha, tamaduni, maarifa na misingi ya mahusiano ya kijamii.

Pia amesema, safari hizo za kihistoria za meli kutoka bandari moja kwenda nyingine baadaye zilibadilika na kuwa mahusiano ya mtu na mtu, familia na familia na jamii na jamii, hali iliyochangia kujenga uhusiano wa karibu kati ya wananchi wa Oman na Tanzania.

Amesema,mkutano wa wanahabari wa nchi hizo mbili ni fursa ya kutumia kalamu, kamera na teknolojia za kisasa kuandika sura mpya ya historia hiyo na kuendeleza uhusiano uliorithiwa kutoka vizazi vilivyopita.

Dkt.Al Araimi amesema, vyombo vya habari vina jukumu muhimu la kupunguza umbali kati ya wananchi kwa kutoa taarifa sahihi, za kina na zenye kujenga uelewa.

Ameongeza kuwa,ushirikiano kati ya wanahabari wa Oman na Tanzania unaweza kusaidia kuhifadhi kumbukumbu za kihistoria, kubadilishana uzoefu na kujenga uwezo wa kitaaluma miongoni mwa waandishi na wahariri wa nchi hizo mbili.

TEF yafunguka

Naye Mwenyekiti wa Jukwaa la Wahariri Tanzania (TEF), Bw.Deodatus Balile amesema, mkutano huo ni sehemu ya juhudi za kuimarisha uhusiano wa kidiplomasia, kiuchumi na kiutamaduni kati ya Tanzania na Oman kupitia sekta ya habari.

Bw.Balile amesema, ushirikiano huo unaweza kuwa na mchango mkubwa katika kuimarisha weledi, umakini na ufanisi wa vyombo vya habari, hususan katika kipindi ambacho sekta hiyo inakabiliwa na mabadiliko makubwa yanayotokana na teknolojia na maendeleo ya kidijitali.

Amesema, historia ya Tanzania na Oman inaweza kutumika kama msingi wa kuunganisha wananchi wa nchi hizo kupitia vyombo vya habari na majukwaa ya kidijitali.

Vilevile ameeleza kuwa, TEF tangu kuanzishwa kwake mwaka 2007, imekuwa ikilenga kuimarisha weledi wa uandishi wa habari, uhakiki wa taarifa, uendelevu wa vyombo vya habari na uwajibikaji kwa jamii.

Bw.Balile amesema, ushirikiano kati ya wanahabari wa Tanzania na Oman unaweza kuwapa waandishi fursa ya kupata uzoefu wa mazingira tofauti ya uandishi, kujenga mitandao ya kitaaluma na kupata vyanzo vipya vya habari.

Amesema, wanahabari kutoka Oman wanaweza pia kutumia ziara hiyo kujenga uhusiano na wahariri, taasisi za umma, wataalamu na wadau mbalimbali nchini Tanzania ili kupata uelewa mpana wa historia na mazingira ya kijamii na kiuchumi ya nchi.

Kwa upande mwingine, amesema wanahabari wa Tanzania wanaweza kunufaika na uzoefu wa wenzao wa Oman katika kuandika na kuripoti masuala yanayohusu nchi hiyo na eneo la Mashariki ya Kati.

Bw.Balile amesema, ushirikiano huo unaweza kuufanya uhusiano wa kihistoria kati ya Tanzania na Oman uende hatua nyingine kwa kutumia uandishi wa habari kama daraja la kuunganisha watu.

Amesema, badala ya historia kuishia katika simulizi za safari za majahazi na biashara za zamani, wanahabari wa kizazi cha sasa wana nafasi ya kuendeleza uhusiano huo kupitia kalamu, picha, video na teknolojia za kisasa.

Amesema waandishi wanaweza kufuatilia na kuandika simulizi za watu, familia, wafanyabiashara na jamii zilizounganishwa na historia ya Tanzania na Oman, hatua ambayo inaweza kuongeza uelewa wa wananchi kuhusu uhusiano huo.

“Majahazi yalikuwa yanabeba watu, lakini sasa kalamu zetu na kamera zibebe utamaduni kutoka pande zote mbili,”ameema Bw.Balile katika mkutano huo.

Amesema, ushirikiano huo pia unaweza kupanua mtandao wa kitaaluma wa wanahabari wa Oman katika Bara la Afrika, kupitia mahusiano yaliyopo kati ya TEF na taasisi nyingine za habari barani humo.

Bw.Balile ameeleza kuwa,TEF imekuwa ikishiriki katika mipango ya kuunganisha wanahabari kutoka nchi mbalimbali za Afrika, ikiwemo kongamano la kwanza la vyombo vya habari Afrika lililofanyika Arusha mwaka 2022, ambalo lilihudhuriwa na wanahabari kutoka nchi mbalimbali za bara hilo.

Mpango wa miezi 12

Wakati huo huo, Bw.Balile amependekeza Tanzania na Oman kuandaa mpango wa utekelezaji wa miezi 12 utakaoainisha maeneo ya ushirikiano kati ya wanahabari wa nchi hizo mbili.

Amesema, mpango huo unaweza kujumuisha ziara za kubadilishana uzoefu katika vyombo vya habari, utayarishaji wa habari za pamoja, mafunzo ya kitaaluma, uhakiki wa taarifa na matumizi ya teknolojia mpya katika uandishi wa habari.

Amependekeza pia kuwe na waratibu kutoka pande zote mbili watakaofuatilia utekelezaji wa makubaliano yatakayofikiwa ili kuhakikisha ushirikiano huo unakuwa endelevu na wenye matokeo yanayoonekana.

Bw.Balile amesema, maeneo mengine yanayoweza kupewa kipaumbele ni matumizi yenye uwajibikaji ya akili unde, uandishi wa habari katika mazingira ya kidijitali, uendelevu wa biashara za vyombo vya habari na mbinu za kukabiliana na changamoto zinazoletwa na mabadiliko ya teknolojia.

Akizungumzia mustakabali wa vyombo vya habari, Bw.Balile amesema, mabadiliko ya teknolojia hayapaswi kutafsiriwa kama mwisho wa vyombo vya habari vya jadi, bali kama fursa ya kubadilisha namna habari zinavyotengenezwa, kusambazwa na kufikiwa na wasomaji.

Amesema,magazeti na vyombo vingine vya habari bado vina nafasi muhimu katika kuhakikisha wananchi wanapata taarifa zilizohakikiwa, hasa katika kipindi ambacho mitandao ya kijamii imeongeza kasi ya usambazaji wa taarifa.

Amesema, changamoto kubwa iliyopo ni kuhakikisha vyombo vya habari vinaendana na mabadiliko ya kiteknolojia huku vikitafuta mifumo mipya ya mapato itakayoviwezesha kuendelea kutoa huduma ya habari kwa umma.

Amesisitiza kuwa, badiliko la teknolojia halimaanishi lazima chombo cha habari kipotee, bali kinaweza kubadili mfumo wa kuwafikia wasomaji kutoka kwenye nakala za karatasi kwenda kwenye majukwaa ya kidijitali."Gazeti kama lilikuwa linasomwa kwa kushikiliwa mikononi, tusione aibu gazeti hili hili kusomwa kupitia simu ya mkononi,” amesema Bw.Balile.

Amesema,ushirikiano wa Tanzania na Oman katika sekta ya habari unaweza kuwa fursa ya kujifunza kwa pamoja namna ya kukabiliana na mabadiliko ya kiteknolojia huku ukilinda misingi ya taaluma na maadili ya uandishi wa habari.

Katika kongamano hilo, TEF na OJA zimesaini Hati ya Makubaliano ya Ushirikiano (MoU) itakayowezesha kubadilishana waandishi wa habari na wahariri, uzoefu, pamoja na mafunzo ya kitaaluma kati ya Tanzania na Oman.