Maelfu wafurika Mtwara uzinduzi wa Bima ya Afya kwa Wote

NA GODFREY NNKO

MAELFU ya wananchi na viongozi wamejitokeza katika Uwanja wa Saba Saba mkoani Mtwara kushuhudia uzinduzi rasmi wa uandikishaji wa Awamu ya Pili ya Mpango wa Bima ya Afya kwa Wote.

Hatua hiyo inalenga kupanua wigo wa upatikanaji wa huduma za afya na kupunguza vikwazo vya kifedha vinavyowakabili wananchi wanapohitaji matibabu.

Uzinduzi huo unaofanyika leo Oktoba 22, 2026 umewakutanisha wananchi kutoka maeneo mbalimbali ndani na nje ya mkoa huo pamoja na viongozi na wadau kutoka sekta ya umma na binafsi. Mgeni rasmi katika hafla hiyo ni Waziri wa Afya, Mheshimiwa Mohamed Mchengerwa.

Mpango huo ni sehemu ya jitihada za Serikali za kuweka mazingira yatakayowawezesha Watanzania kupata huduma za afya kwa kuzingatia mahitaji yao na uwezo wao wa kiuchumi, bila gharama za matibabu kuwa kikwazo cha msingi katika kutafuta huduma wanapougua.

Kupitia mfumo huo, wananchi wanatarajiwa kupata fursa pana zaidi ya kufaidika na huduma za afya kwa gharama wanazomudu, huku familia zikisaidiwa kupunguza mzigo wa kifedha unaoweza kujitokeza wakati wa matibabu, hasa pale yanapohitajika kwa dharura au kwa muda mrefu.

Utekelezaji wa Sheria ya Bima ya Afya kwa Wote ulianza rasmi Januari 26, 2026 ukiwa na lengo la kuweka msingi wa mfumo mpana wa kugharamia huduma za afya na kuongeza fursa za wananchi kupata matibabu kwa kuzingatia uwezo wao wa kifedha.

Awamu ya Pili ya mpango huo inafuatia hatua ya kwanza ya utekelezaji na inalenga kupanua wigo wa wananchi watakaonufaika na bima hiyo, sambamba na kuimarisha upatikanaji na utoaji wa huduma katika vituo vya afya nchini.

Wananchi wa Mtwara waeleza matumaini yao

Wakati huo huo, kwa nyakati tofauti, wananchi wa Mtwara wameeleza matumaini yao kuhusu utekelezaji wa Bima ya Afya kwa Wote, wakisema mpango huo unaweza kuwa msaada kwa familia zinazokabiliwa na changamoto za kumudu gharama za matibabu.

Yusuph Khamisi na Yusra Said, wakazi wa Mtwara Mjini wameeleza kufurahishwa na kuanzishwa kwa mpango huo, wakiamini kuwa unaweza kuongeza uhakika wa wananchi kupata huduma za afya na kupunguza wasiwasi unaotokana na gharama kubwa za matibabu.

Yusra amesema, bima ya afya ina umuhimu mkubwa kwa jamii kwa sababu maradhi yanaweza kumpata mtu wakati wowote, bila kujali kipato chake.

Hali hiyo inafanya uwepo wa mfumo wa kugharamia huduma za matibabu kuwa jambo muhimu katika kulinda ustawi wa familia.

Vilevile, wananchi hao wanaamini kuwa, kupanuliwa kwa wigo wa bima kutasaidia watu wengi zaidi kuwa na nafasi ya kutafuta matibabu wanapoyahitaji, badala ya kutegemea fedha walizonazo wakati huo pekee.

Aidha, wamesema familia zenye kipato kidogo, gharama za matibabu zinaweza kuathiri uwezo wa kugharamia chakula, elimu, makazi na mahitaji mengine ya msingi.

Hivyo, mfumo wa bima unaotekelezwa kwa ufanisi unaweza kusaidia kupunguza mgongano huo wa mahitaji na kuimarisha usalama wa kifedha wa kaya.