China imetoa wito kwa mataifa mengine duniani kuheshimiana na kuacha kuingilia masuala ya ndani ya nchi nyingine kwa kisingizio chochote kile na kueleza kuridhishwa kwake na namna mchakato wa Uchaguzi mkuu unavyoendelea hapa nchini, anaripoti Mwandishi Diramakini.
Kauli hiyo imetolea na Balozi wa China nchini Tanzania, Wang Ke Jijini wakati wa mazungumzo na Katibu Mkuu Wizara ya Mambo ya Nje na Ushirikiano wa Afrika Mashariki, Balozi Brigedia Jenerali Wilbert Ibuge jijini Dar es Salaam.
Balozi huyo amesema kuwa,ni lazima mataifa yote yaendeleze mahusiano mema miongoni mwao na kutoingilia masuala ya ndani ya mataifa mengine. "Ni vyema mataifa yote yakaendeleza mahusiano mema miongoni mwao na kuhakikisha kuwa hayaingilii masuala ya ndani kati ya Taifa moja na jingine,"amesema Balozi Wang Ke. 
Katibu Mkuu Wizara ya Mambo ya Nje na Ushirikiano wa Afrika Mashariki, Balozi, Brigedia Jenerali Wilbert Ibuge akiongea na Balozi wa China hapa nchini, Wang Ke wakati walipokutana kwa mazungumzo jijini Dar es Salaam.
Balozi wa China hapa Nchini Mhe. Wang Ke akimuelezea jambo Katibu Mkuu Wizara ya Mambo ya Nje na Ushirikiano wa Afrika Mashariki, Balozi, Brigedia Jenerali Wilbert Ibuge.
Balozi wa China hapa nchini, Wang Ke akimkabidhi kitabu kinachoelezea maendeleo ya China Katibu Mkuu Wizara ya Mambo ya Nje na Ushirikiano wa Afrika Mashariki, Balozi Brigedia Jenerali Wilbert Ibuge.
Aidha Balozi Wang Ke ameongeza kuwa China itaendelea kuheshimu masuala
ya ndani ya mataifa yote Tanzania ikiwemo na kueleza kuridhika kwake na
mchakato wa kampeni za uchaguzi mkuu zinavyoendelea nchini na kuwatakia
Watanzania kila la heri katika uchaguzi huo.
Kwa upande wake
Katibu Mkuu Wizara ya Mambo ya Nje na Ushirikiano wa Afrika Mashariki,
Balozi Brigedia Jenerali Wilbert Ibuge amesema, ushirikiano uliopo baina
ya Tanzania na China kisiasa, kiuchumi na kijamii ni madhubuti na imara
na kwamba Tanzania itaendelea pia kuheshimu mashirikiano na mataifa
mengine.
Aidha Katibu Mkuu Balozi Brigedia Jenerali Ibuge
ameishukuru China kwa Ushirikiano wake wa kimkakati kwa Tanzania na
kwamba uhusiano huo utaendelea kudumishwa kwa maslahi ya pande zote
mbili.
"Serikali ya Tanzania kwa kweli inaishukuru China kwa
Ushirikiano wake wa kimkakati na tunakuahidi kwamba uhusiano wetu
utaendelea kudumishwa kwa maslahi mapana ya pande zote mbili,"amesema
Balozi Ibuge.