SHINYANGA-Mtoto mchanga wa kike aliyeibwa Agosti 20,2024 saa 12:00 jioni katika Kijiji cha Mbika katika Kituo cha Afya Ushetu wilayani Kahama Mkoa wa Shinyanga amepatikana akiwa hai.
Hayo yamebainishwa Agosti 24,2024 na Kamanda wa Polisi Mkoa wa Shinyanga, Janeth Magomi ambapo amesema, mtoto huyo alizaliwa Agosti 17,2024 na aliendelea kuwepo kituo cha afya kwa uangalizi zaidi,lakini siku ya tukio baada ya Mama yake mzazi kutoka nje kufanya mazoezi ndipo mtuhumiwa alimuiba mtoto huyo.
Magomi amesema taarifa za tukio hilo ziliripotiwa kituo cha Polisi Nyamilangano Agosti 21,2024 na ufuatiliaji wa haraka ulifanyika na Agosti 22,2024 saa tatu usiku Polisi walifanikiwa kumkamata mtuhumiwa aitwaye Hadija Juma (24) mkazi wa Kijiji cha Sengerema Wilaya ya Uyui Mkoa wa Tabora akiwa na mtoto huyo.
“Mtuhumiwa huyo baada ya kumhoji amekiri kuwa aliiba mtoto baada ya kuolewa mara mbili bila ya kufanikiwa kupata mtoto ambapo aliolewa Ushetu miaka miwili hakupata mtoto akaolewa Wilaya ya Uyui hakupata mtoto, hivyo aliamua kuiba mtoto,” alisema huku taratibu za kumfikisha mahakamani mtuhumiwa huyo zikiendelea.
Tags
Kurasa za Magazeti
Kurasa za Mbele na Nyuma za Magazeti
Magazeti
Magazeti ya Leo
Magazetini
Magazetini leo
Yaliyojiri Magazetini Leo