Namibia yaweka historia kwa kulipa deni lote la IMF

NA DIRAMAKINI

SERIKALI ya Namibia imetangaza mafanikio makubwa ya kifedha baada ya kulipa kikamilifu mkopo wa dharura wa thamani ya dola za Namibia bilioni 3.9 (N$3.9bn) uliokuwa umetolewa na International Monetary Fund (IMF), hatua iliyosababisha deni lake kwa taasisi hiyo kufikia sifuri.

Kwa mujibu wa taarifa rasmi, mkopo huo ulitolewa kupitia mpango wa Rapid Financing Instrument (RFI), uliolenga kusaidia nchi kukabiliana na athari za kiuchumi zilizotokana na misukosuko ya kimataifa, ikiwemo janga la COVID-19.

Msemaji wa Wizara ya Fedha ya Namibia, Wilson Shikongo amenukuliwa na The Brief akieleza kuwa,malipo ya mwisho kwa IMF yalifanyika Aprili 15,mwaka huu yakihitimisha mkopo ulioidhinishwa Aprili,2021 na IMF.

Kulipwa kwa mkopo huo kunahitimisha rasmi ushiriki wa Namibia katika mpango huo wa dharura.

Hatua hiyo inaashiria mafanikio ya sera za nidhamu ya fedha na usimamizi wa deni la taifa, ambapo nchi imeweza kupunguza utegemezi wake kwa mikopo ya nje.

Takwimu za hivi karibuni zinaonesha kuwa, kabla ya malipo hayo ya mwisho, deni la Namibia kwa IMF lilikuwa limebaki katika kiwango kidogo, kabla ya kufutwa kabisa baada ya ulipaji huo.

Wachambuzi wa uchumi wanaona hatua hiyo kama ishara chanya kwa uthabiti wa uchumi wa Namibia, huku ikitarajiwa kuongeza imani ya wawekezaji wa ndani na wa kimataifa.

Aidha, hatua hiyo inaweza kusaidia kuboresha hadhi ya mikopo ya taifa (credit rating) na kupunguza gharama za kukopa siku zijazo.

Kwa upande wa taasisi za fedha za kimataifa, International Monetary Fund imekuwa mshirika muhimu kwa nchi nyingi zinazoendelea katika kutoa mikopo ya dharura na ushauri wa sera za kiuchumi.

Hata hivyo, kulipa deni lote kunaipa Namibia nafasi kubwa ya kupanga sera zake za kiuchumi kwa uhuru zaidi bila masharti ya mikopo hiyo.

Kwa ujumla, tukio hili linaweka Namibia miongoni mwa nchi chache barani Afrika zilizofanikiwa kulipa kikamilifu mikopo ya dharura kutoka IMF katika kipindi kifupi, jambo linalotafsiriwa kama hatua muhimu kuelekea uthabiti wa kifedha na ukuaji endelevu wa uchumi.

Awali,Waziri wa Fedha wa Namibia, Lipumbu Shiimi alisema kuwa,mkopo huo ulikuwa muhimu sana katika kuiwezesha serikali kukabiliana na janga la afya, ikiwa ni pamoja na ununuzi wa chanjo na kusaidia utekelezaji wa mpango wa kitaifa wa utoaji chanjo, pamoja na kupunguza athari pana za kiuchumi.(NA)