NA DIRAMAKINI
WAZIRI wa Nchi, Ofisi ya Rais, Menejimenti ya Utumishi wa Umma na Utawala Bora, Mheshimiwa Ridhiwani Kikwete amewataka maafisa wapya watarajiwa wa Taasisi ya Kuzuia na Kupambana na Rushwa (TAKUKURU) kuzingatia maadili ya utumishi wa umma, kutunza siri za kiuchunguzi na kutekeleza majukumu yao kwa uadilifu, weledi na uzalendo ili kuimarisha mapambano dhidi ya rushwa nchini.
Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Ridhiwani Kikwete akiwa katika picha ya pamoja na baadhi ya vijana wanaofanya mafunzo ya awali ya Uchunguzi ya Taasisi ya Kuzuia na Kupambana na Rushwa (TAKUKURU) mara baada ya Waziri huyo kufungua mafunzo hayo katika Shule ya Polisi Tanzania-Moshi.
Waziri Kikwete ametoa wito huo Oktoba 8, 2026 wakati akizindua mafunzo ya awali kwa maafisa wa TAKUKURU mjini Moshi, mkoani Kilimanjaro, akisisitiza kuwa taasisi hiyo ina dhamana nyeti ya kulinda maslahi ya umma na kuhakikisha kuwa mapambano dhidi ya rushwa yanafanyika kwa kuzingatia sheria na maadili.
Amesema, Serikali inatarajia maafisa hao watakuwa watumishi waadilifu na wenye nidhamu watakaolinda heshima ya taasisi hiyo, kutekeleza majukumu yao kwa weledi na kuwa mfano bora katika kusimamia maadili ya utumishi wa umma.
Katika hotuba yake, Waziri Kikwete amewapongeza washiriki waliofikia hatua ya mwisho ya mchakato wa ajira, akieleza kuwa nafasi hizo ni fursa muhimu inayopaswa kutumiwa kwa uwajibikaji na kujituma katika kulitumikia taifa.
Amesema, mchakato wa ajira ulianza kwa kutangazwa kwa nafasi 500 za maafisa uchunguzi na wachunguzi wasaidizi, huku waombaji wakiwa zaidi ya 30,000. Kati ya waombaji hao, watu 250 wamechaguliwa kuendelea na hatua husika ya mchakato.
Waziri huyo amewataka waliochaguliwa kutambua uzito wa dhamana waliyopewa na kuitumia nafasi hiyo kwa manufaa ya taifa, badala ya kuichukulia kama ajira ya kawaida isiyohitaji uwajibikaji wa kiwango cha juu.
Waziri Kikwete amesema, Serikali ya Awamu ya Sita inayoongozwa na Rais Dkt. Samia Suluhu Hassan inatambua umuhimu wa mafunzo ya awali katika kuwajengea maafisa wa TAKUKURU uwezo wa kutekeleza majukumu yao kwa uadilifu na weledi.
Amesema, mafunzo hayo ni sehemu muhimu ya maandalizi ya watumishi wanaotarajiwa kushiriki katika shughuli za kuzuia na kupambana na rushwa, hivyo ni lazima washiriki wayachukulie kwa uzito unaostahili.
Vilevile, mafunzo hayo yanatarajiwa kudumu kwa kipindi cha miezi mitano, ambapo washiriki wanapaswa kufuata miongozo, maelekezo na taratibu zote zitakazowekwa na wawezeshaji pamoja na uongozi wa taasisi.
Amesisitiza kuwa, muda huo unapaswa kutumiwa kujifunza na kujenga misingi imara ya kitaaluma, nidhamu na maadili yatakayowaongoza katika utekelezaji wa majukumu yao watakapopangiwa vituo vya kazi.
“Ni matarajio yangu na ya Serikali kuwa mtayachukulia mafunzo haya kwa uzito unaotakiwa ili mtakapomaliza muwe mabalozi wema wa TAKUKURU katika vituo mtakavyopangiwa kufanya kazi,” amesisitiza.
Ameongeza kuwa, mafanikio ya mafunzo hayo hayatapimwa kwa kukamilika kwa muda uliopangwa pekee, bali pia kwa uwezo wa washiriki kuonesha uadilifu, uwajibikaji, nidhamu na utayari wa kutekeleza majukumu yao kwa kuzingatia sheria.
Akizungumzia wajibu wa maafisa hao watakapokuwa kazini, Waziri Kikwete amesisitiza umuhimu wa kutunza siri, akieleza kuwa TAKUKURU ni taasisi nyeti inayotekeleza majukumu yanayohitaji umakini mkubwa na uzingatiaji wa maadili ya kitaaluma.
Amesema, maafisa hao wanapaswa kuelewa kuwa taarifa wanazokutana nazo katika utekelezaji wa majukumu yao zinahitaji kulindwa kwa mujibu wa sheria na taratibu za kazi, ili kuepusha uvujishaji wa taarifa zinazoweza kuathiri uchunguzi au kuharibu uaminifu wa taasisi.
Ameeleza kuwa, utunzaji wa siri ni sehemu muhimu ya uwajibikaji kwa maafisa wa uchunguzi, hivyo wanapaswa kuepuka matumizi mabaya ya taarifa, kushawishiwa na watu wenye maslahi binafsi au kufanya vitendo vinavyoweza kuathiri mwenendo wa kazi zao.
Pia, amewataka kutekeleza majukumu yao bila upendeleo, kwa kuzingatia sheria na ushahidi, huku wakilinda haki za watu wanaohusika katika taratibu za uchunguzi.
Kwa mujibu wa Waziri Kikwete, maafisa hao wanapaswa kuwa mstari wa mbele kulinda taswira ya TAKUKURU kwa kuhakikisha kuwa mwenendo wao binafsi na wa kitaaluma unaendana na dhamana waliyopewa na Serikali na wananchi.
Waziri Kikwete amesema, mapambano dhidi ya rushwa yanahitaji watumishi wenye uadilifu na dhamira ya kweli ya kutetea maslahi ya taifa, akiwataka maafisa hao kutekeleza majukumu yao kwa vitendo badala ya kuridhika na kauli za kupinga rushwa.
Amesema, rushwa ni changamoto inayohitaji juhudi za pamoja, usimamizi thabiti wa maadili na uwajibikaji katika taasisi za umma na sekta nyingine za jamii.
Hivyo, amewataka maafisa hao kutumia maarifa watakayoyapata katika mafunzo yao kutekeleza majukumu kwa weledi, kufuata taratibu za uchunguzi na kuchangia katika kujenga mazingira yanayokataa vitendo vya rushwa.
Ameeleza kuwa, wanapaswa kuwa mfano wa kuigwa katika jamii kwa kuonesha uaminifu, nidhamu na kutanguliza maslahi ya taifa mbele ya maslahi binafsi.
Waziri huyo amesisitiza kuwa, watumishi wa TAKUKURU wanapaswa kuelewa kuwa jukumu lao si kuchunguza na kushughulikia tu tuhuma za rushwa, bali pia kulinda uaminifu wa wananchi kwa taasisi na mifumo inayosimamia uwajibikaji.
Katika hatua nyingine, Waziri Kikwete amewataka maafisa hao kulinda heshima na taswira ya TAKUKURU kwa kuhakikisha kuwa kila wanachokifanya kinaendana na sheria, maadili na matarajio ya wananchi.
Amesema, tabia ya mtumishi mmoja inaweza kuathiri namna wananchi wanavyoitazama taasisi nzima, hivyo kila afisa anapaswa kutambua kuwa anawajibika kulinda uaminifu uliojengwa na taasisi hiyo.
Amehimiza washiriki kujenga tabia ya kujituma, kuheshimu viongozi na wenzao, kufuata taratibu za kiutumishi na kutekeleza majukumu kwa uwazi unaoruhusiwa na sheria, bila kuathiri usiri wa taarifa za kiuchunguzi.
Aidha, amewataka kuepuka vitendo vinavyoweza kuibua mashaka kuhusu uadilifu wao, ikiwamo kutumia nafasi za kazi kujinufaisha binafsi au kuwasaidia watu wanaotaka kukwepa sheria.
Kwa upande mwingine, amesisitiza umuhimu wa maafisa hao kuzingatia uzalendo na kutambua kuwa dhamana waliyopewa ni ya kuwatumikia wananchi wote bila ubaguzi wala upendeleo.
Waziri Kikwete amesema, Serikali inatarajia maafisa hao watakapohitimu mafunzo na kupangiwa vituo vya kazi wawe tayari kutekeleza majukumu yao kwa ufanisi, uadilifu na uwajibikaji.
Amesema, mafunzo hayo yanapaswa kuwa msingi wa kuwajenga watumishi wanaoweza kukabiliana na changamoto za kazi za kiuchunguzi huku wakiheshimu sheria na viwango vya kitaaluma.
Amewataka washiriki kutumia fursa hiyo kujiandaa kuwa sehemu ya juhudi za taifa za kuimarisha utawala bora, uwajibikaji na mapambano dhidi ya rushwa.
Hata hivyo, Waziri Kikwete amehitimisha kwa kuwakumbusha kuwa, dhamana ya kufanya kazi TAKUKURU ni wajibu unaohitaji kujitoa, kutunza siri, kufanya kazi kwa bidii na kulinda heshima ya taasisi wanayojiandaa kuitumikia.