NA DIRAMAKINI
TIMU ya Taifa ya Canada imeshindwa kuanza vema kampeni yake ya Kombe la Dunia 2026 baada ya kulazimishwa sare ya bao 1-1 na Bosnia & Herzegovina katika mchezo wa ufunguzi.
Picha na GlobalMail.
Mchezo huo umechezwa kwenye Uwanja wa BOM jijini Toronto, mbele ya maelfu ya mashabiki waliokuwa wamejitokeza kuipa sapoti timu yao.
Canada, ambayo ni mmoja wa waandaaji wa mashindano hayo kwa kushirikiana na Marekani na Mexico, ilijikuta ikianza mchezo huo kwa presha baada ya kuruhusu bao la mapema lililofungwa na mshambuliaji wa Bosnia, Jovo Lukic dakika ya 21.
Bao hilo lilitokana na mpira wa kona uliopigwa kwa ustadi na Sead Kolasinac, ambapo Lukic aliruka juu na kuunganisha kwa kichwa kilichoishia moja kwa moja wavuni, na kuwanyamazisha mashabiki wa wenyeji waliokuwa na matumaini ya kuona timu yao ikianza kwa ushindi.
Aidha,baada ya kuruhusu bao hilo, Canada iliongeza kasi ya mashambulizi katika jitihada za kusawazisha matokeo.
Kikosi hicho kilitawala sehemu kubwa ya mchezo na kuendelea kutengeneza nafasi mbalimbali za kufunga, huku safu ya ulinzi ya Bosnia ikionesha uimara mkubwa katika kuzuia mashambulizi hayo.
Juhudi za Canada hatimaye zilizaa matunda dakika ya 78 pale mshambuliaji Cyle Larin alipofunga bao la kusawazisha baada ya kupokea pasi safi kutoka kwa Promise David.
Bao hilo liliamsha shangwe kubwa miongoni mwa mashabiki wa nyumbani ambao walikuwa wakisubiri kwa hamu kuona timu yao ikirejea mchezoni.
Licha ya kuongeza nguvu katika dakika za mwisho za mchezo, Canada ilishindwa kupata bao la pili la ushindi huku Bosnia nayo ikikosa kutumia nafasi chache ilizozipata.
Matokeo hayo yameifanya kila timu kuondoka na alama moja katika mchezo huo wa kwanza wa mashindano.
Takribani mashabiki 45,000 waliofurika katika Uwanja wa BOM walishuhudia pambano lenye ushindani mkubwa, lakini waliondoka bila kuona Canada ikiandika ushindi wake wa kwanza wa Kombe la Dunia kwenye ardhi ya nyumbani.
Matokeo hayo yanaifanya Canada kuendelea kusaka ushindi wake wa kwanza katika michuano hiyo, huku macho yote sasa yakielekezwa kwenye mchezo wake ujao dhidi ya Qatar, waandaaji wa Kombe la Dunia la mwaka 2022, utakaochezwa Juni 19.
Canada iliingia katika mchezo huo ikiwa imekumbwa na pengo kubwa la kukosekana kwa nahodha na nyota wake tegemeo, Alphonso Davies, ambaye yuko nje ya uwanja kutokana na majeraha ya misuli.
Hata hivyo, nyota wengine akiwemo Jonathan David pamoja na Stephen Eustáquio walijitahidi kuiongoza timu hiyo na kuhakikisha haipotezi mchezo wake wa kwanza.
Kwa upande wa Bosnia & Herzegovina, timu hiyo nayo ilikabiliwa na changamoto ya kukosekana kwa nahodha wake mkongwe, Edin Džeko, ambaye amekuwa mmoja wa wachezaji muhimu wa taifa hilo katika safari ya kufuzu Kombe la Dunia 2026.
Džeko alishindwa kushiriki mchezo huo kutokana na majeraha, hali iliyowalazimu makocha wa Bosnia kufanya mabadiliko katika safu yao ya ushambuliaji.
Licha ya kukosekana kwa nyota muhimu kwa pande zote mbili, mchezo huo ulitoa ushindani mkubwa na kuashiria mwanzo wa kuvutia wa mashindano hayo makubwa zaidi ya soka duniani, huku Canada na Bosnia zikionyesha dhamira ya kupambana katika mechi zao zijazo.