NA DIRAMAKINI
TIMU za Taifa za Iran na New Zealand zimegawana pointi baada ya kutoka sare ya mabao 2-2 katika mchezo wa kusisimua wa Kundi G wa Kombe la Dunia la FIFA 2026, matokeo yaliyozidi kuongeza ushindani katika kundi hilo ambalo tayari linaonekana kuwa moja ya makundi yenye mvutano mkubwa katika hatua ya awali ya mashindano.
Mchezo huo,katika dimba la Los Angeles Stadium, Inglewood jijini Carlifonia nchini Marekani umeshuhudia ushindani mkubwa kutoka kwa timu zote mbili huku ukitoa burudani ya hali ya juu kwa mashabiki,pia New Zealand wameonekana kuwa karibu zaidi na ushindi mara mbili kabla ya Iran kurejea na kusawazisha matokeo.
Shujaa wa New Zealand alikuwa mshambuliaji Eli Just anayekipiga katika klabu ya Motherwell, ambaye aliifungia timu yake mabao yote mawili na kuonesha makali makubwa katika safu ya ushambuliaji.
New Zealand walifanikiwa kupata bao la kwanza kupitia Just, aliyewapa timu yake mwanzo mzuri dhidi ya Iran. Hata hivyo, furaha hiyo haikudumu kwa muda mrefu baada ya Iran kusawazisha kupitia bao la kuvutia lililofungwa na Ramim Rezaeian.
Beki huyo wa Iran aliandika moja ya mabao mazuri ya mashindano hayo hadi sasa baada ya kufunga kwa ustadi mkubwa wa kisigino, akimshinda mlinda mlango wa New Zealand na kurejesha matumaini kwa timu yake wakati ilipokuwa ikihitaji majibu ya haraka.
Licha ya Iran kusawazisha, New Zealand walionesha uimara na kurejea tena mbele kupitia bao la pili la Just, ambaye aliendelea kuwa mwiba kwa safu ya ulinzi ya wapinzani wao.
Bao hilo lilionekana kuwa linaweza kuipa New Zealand ushindi muhimu katika harakati za kusaka tiketi ya hatua inayofuata, lakini Iran walikataa kukubali kushindwa.
Kadiri dakika zilivyokuwa zikisogea mbele, Iran waliongeza kasi ya mashambulizi na hatimaye juhudi zao zilizaa matunda kupitia Mohammad Mohebbi aliyefunga bao la pili la kusawazisha na kuihakikishia timu yake pointi moja muhimu.
Bao hilo liliamsha shangwe kubwa katika benchi la ufundi la Iran na mashabiki wao, huku likizima matumaini ya New Zealand ya kuondoka na ushindi wa kwanza wa kundi hilo.
Matokeo hayo yanamaanisha kuwa,timu zote mbili zimeanza kampeni zao kwa kupata pointi moja, huku zikionesha uwezo wa kupambana na kutengeneza ushindani mkali katika mechi zijazo.
Sare hiyo pia imekuja baada ya mchezo mwingine wa Kundi G kumalizika kwa sare ya mabao 1-1 kati ya Ubelgiji na Misri, hali inayofanya timu zote nne za kundi hilo kuanza mashindano kwa pointi moja kila moja.
Kutokana na matokeo hayo, Kundi G linaingia katika hatua inayofuata likiwa wazi kabisa, ambapo hakuna timu iliyofanikiwa kujitenga kileleni mwa msimamo. Hali hiyo inaashiria kuwa kila mchezo ujao utakuwa na umuhimu mkubwa katika kuamua timu zitakazofuzu kwenda hatua ya mtoano.
Wachambuzi wa soka wanaamini kuwa matokeo hayo yanalifanya Kundi G kuwa miongoni mwa makundi yenye ushindani mkali zaidi katika Kombe la Dunia 2026, kwani timu zote zimeonesha uwezo wa kushindana na kupata matokeo dhidi ya wapinzani wao.
Pia,kwa matokeo hayo, mbio za kufuzu kutoka Kundi G zimeendelea kuwa wazi kwa kila timu, huku Iran na New Zealand zikiondoka uwanjani zikiwa zimeonesha dhamira ya kupigania nafasi ya kusonga mbele katika Kombe la Dunia 2026.