NA DIRAMAKINI
BILIONEA wa Nigeria, Femi Otedola ametumia takribani dola milioni 300 za Marekani mwaka huu kununua hisa katika kampuni ya First HoldCo, hatua iliyoongeza kwa kiasi kikubwa umiliki wake katika kampuni mama ya FirstBank mojawapo ya benki kongwe zaidi Afrika Magharibi.
Kwa mujibu wa taarifa za soko, umiliki wa Otedola umeongezeka kutoka asilimia 5.65 kabla ya kuteuliwa kuwa Mwenyekiti wa First HoldCo hadi zaidi ya asilimia 26, hali inayomfanya kuwa mwanahisa mkubwa zaidi katika kampuni hiyo.
Aidha,kiwango hicho cha ununuzi wa hisa kinatafsiriwa kuwa zaidi ya uwekezaji wa kawaida wa kifedha, huku Otedola akieleza kuwa anafuata mkakati unaofanana na alioutumia katika kampuni nyingine ambazo baadaye alipata ushawishi mkubwa au udhibiti wa umiliki.
Kauli hiyo imechochea mjadala katika sekta ya fedha Nigeria kuhusu uwezekano wa bilionea huyo kuongeza umiliki wake hadi zaidi ya asilimia 51 ya First HoldCo.
Otedola ambaye maslahi yake ya biashara yanaenea katika sekta za nishati, uzalishaji umeme na fedha, amesema anaendelea kufuata mwelekeo alioutumia katika uwekezaji wake mwingine.
“Ninafuata mwelekeo unaofanana katika First HoldCo,”amesema Otedola, kauli iliyoongeza matarajio kwamba anaweza kuendelea kuongeza ushawishi wake katika kampuni hiyo.
FIRSTBANK KATIKA KIINI CHA UWEKEZAJI
Iwapo Otedola atafanikisha kupata zaidi ya asilimia 51 ya First HoldCo, hatua hiyo itampa udhibiti wa FirstBank, taasisi ya kifedha yenye historia ya miaka 132 na inayotoa huduma Nigeria,Ghana, Guinea, Sierra Leone, Senegal, Jamhuri ya Kidemokrasia ya Congo, Gambia na Uingereza.
FirstBank ni miongoni mwa benki kubwa nchini Nigeria kwa upande wa mali na mtandao wa matawi, huku ikiwa na nafasi muhimu katika biashara na huduma za fedha Afrika Magharibi.
Kwa hiyo, ongezeko la umiliki wa Otedola linaweza kuwa na athari kubwa katika muundo wa umiliki na uongozi wa taasisi hiyo ya kifedha.
NJIA YA KUFIKIA ASILIMIA 51
Pamoja na kuwa tayari amevuka asilimia 26 ya umiliki, Otedola bado anahitaji kuongeza zaidi ya asilimia 25 ya hisa za First HoldCo ili kufikia kiwango cha umiliki kinachozidi asilimia 51.
Wachambuzi wa soko wanaona kuwa hatua hiyo itahitaji mtaji mkubwa zaidi kutokana na ukubwa wa kampuni na ukwasi wa hisa zake katika soko.
Iwapo ataendelea na ununuzi huo kwa kasi iliyopo, mkakati huo unaweza kubadili kwa kiasi kikubwa muundo wa umiliki na utawala wa kampuni, pamoja na kuathiri mwelekeo wa kimkakati wa FirstBank.
ATHARI KWA SEKTA YA BENKI
Ongezeko la umiliki wa Otedola linakuja wakati ushindani katika sekta ya benki nchini Nigeria ukiendelea kuongezeka, huku taasisi za fedha zikijitahidi kuimarisha mitaji, teknolojia na huduma ili kukabiliana na mabadiliko ya mazingira ya biashara.
Wachambuzi wanaeleza kuwa,kuendelea kwa ununuzi wa hisa kunaweza kuleta mabadiliko katika utawala wa kampuni ya First HoldCo na hatimaye kuathiri namna FirstBank inavyojiendesha na kupanga mikakati yake ya biashara.
Otedola aliteuliwa kuwa Mwenyekiti wa First HoldCo baada ya kujenga umiliki wake wa awali katika kampuni hiyo. Tangu wakati huo, ameendelea kuongeza hisa zake na kujiweka kama mwanahisa mwenye umiliki mkubwa zaidi.
Vilevile,iwapo ataendelea kuongeza hisa hadi kufikia zaidi ya asilimia 51, hatua hiyo inaweza kumwezesha kupata udhibiti wa moja kwa moja wa kampuni mama ya FirstBank na kuashiria mabadiliko makubwa katika muundo wa umiliki wa mojawapo ya taasisi muhimu za kifedha barani Afrika Magharibi.