NA GODFREY NNKO
WEKUNDU wa Msimbazi, Simba SC wametembeza kichapo cha 3-0 kwa Red Arrows FC ya nchini Zambia.
Ni katika mtanange ambao umepigwa leo Novemba 28,2021 katika dimba la Benjamin Mkapa lililopo Halmashauri ya Manispaa ya Temeke mkoani Dar es Salaam.
Aidha,licha ya dimba kujaa maji, Simba SC imecheza kandanda safi na kufanikiwa kuondoka mapumziko wakiwa na faida ya mabao mawili yaliyofungwa na Benard Morrison pamoja na Meddie Kagere.
Kipindi cha pili kilianza Simba SC ikionekana bado inahitaji magoli zaidi licha jya kuwa mbele kwa mabao mawili ambapo dakika 79 ilifanikiwa kupata bao la tatu kupitia tena kwa nyota wao Benard Morrison.
Kwa matokeo hayo,Simba inahitaji ushindi wowote ama sare katika mchezo ujao ili waweze kufuzu hatua ya makundi Kombe la Shirikisho ambapo Red Arrows watakuwaa nyumbani kwenye mchezo huo.