NA MWANDISHI DIRAMAKINI
MKUU wa Mkoa Mjini Magharibi, Mheshimiwa Idirisa Kitwana Mustafa amewataka waandishi wa habari nchini kushirikiana na Jeshi la Polisi katika utekelezaji wa majukumu yao ili kuona taaluma hiyo inaendelea kubakia salama.
Mheshimiwa Kitwana amesema hayo alipokuwa akifungua mafunzo ya siku moja kwa waandishi wa habari kutoka vyombo mbalimbali na Jeshi la Polisi yanayohusiana na usalama kwa waandishi wa habari na jeshi hilo Mkoa wa Mjini Magharibi.
Mafunzo ambayo yalifanyika katika ukumbi wa Mamlaka ya Udhibiti wa Huduma za Maji na Nishati Zanzibar (ZURA) uliopo Wilaya ya Mjini Unguja.
Amesema, waandishi wa habari na Jeshi la Polisi ni vyombo vinavyofanya kazi kwa pamoja hivyo ni vyema wakawa na ushirikiano wa karibu ili kufanikisha utendaji wa majukumu yao ya kila siku.