Al-Nassr ya Saudi Arabia ipo katika mazungumzo na Ronaldo

NA DIRAMAKINI

MSHAMBULIAJI nyota wa Ureno, Cristiano Ronaldo yuko kwenye mazungumzo ya kusaini mkataba wa kuvutia na Klabu ya Al-Nassr ya Saudi Arabia kufuatia kujiondoa kwake Manchester United.

Cristiano Ronaldo akishangilia bao la kwanza la Ureno dhidi ya Ghana hivi karibuni huko Qatar. (Picha na REUTERS).

Ronaldo hivi karibuni alitofautiana na mwajiri wake Manchester United, kufuatia mahojiano yenye utata ambapo mchezaji huyo mwenye umri wa miaka 37 aliikosoa klabu hiyo na kusema anahisi kusalitiwa huku akimkosoa kocha Erik ten Hag.

Pande zote mbili zilisema kwamba kuondoka kwa Ronaldo ni uamuzi uliokubaliwa kwa pamoja. Aidha, kwa mujibu wa AFP,chanzo kimoja kilisema Jumatatu klabu hiyo ilikuwa katika mazungumzo mazito na mchezaji huyo, lakini makubaliano bado hayajafikiwa kwa sababu ya masuala kadhaa.

Ronaldo atasaini mkataba wa miaka miwili na nusu wenye thamani ya karibu Euro milioni 200 ($210 milioni) kwa msimu, kuanzia Januari, kulingana na ripoti ya gazeti la Uhispania la Marca.

Hata hivyo, chanzo kingine katika klabu hiyo ya Saudia Arabia kiliiambia AFP kuwa, hakuna kilichosainiwa. Ronaldo alisema alikataa mkataba mkubwa msimu uliopita wa kujiunga na klabu ya Saudia katika mahojiano yake.

Mshindi huyo mara tano wa tuzo ya Ballon d'Or anaweza kuungana na mlinda mlango wa Colombia, David Ospina na kiungo wa kati wa Cameroon Vincent Aboubakar, ambaye kwa sasa anakipiga katika klabu ya Al-Nassr.

Nahodha huyo wa Ureno amekuwa mchezaji wa kwanza kufunga katika Fainali tano za Kombe la Dunia alipofunga penalti katika ushindi wao wa kwanza wa 3-2 dhidi ya Ghana nchini Qatar.

Mshambuliaji huyo aliisaidia timu yake kutwaa ubingwa wa Euro 2016 na ametwaa fedha nyingi katika maisha yake ya klabu akiwa na United, Real Madrid na Juventus.

Nyota huyo wa Ureno alirejea mashetani wekundu mwaka 2021 kupitia uzoefu wake wa pili akiwa na moja ya timu maarufu zaidi za soka duniani baada ya kipindi chake cha kwanza kutoka 2003 hadi 2009, kabla ya kuondoka na kujiunga na Real Madrid ya Uhispania, ambapo alishinda mataji mbalimbali, yakiwemo mataji manne katika Ligi ya Mabingwa.

Hivi karibuni Manchester United walimshukuru Ronaldo kwa mchango wake mkubwa katika vipindi viwili vya Old Trafford, akifunga mabao 145 katika mechi 346, na kumtakia heri yeye na familia yake kwa siku zijazo.

"Klabu inamshukuru kwa mchango wake mkubwa katika misimu miwili Old Trafford," ilisema taarifa ya Manchester United.

Pia walimtakia yeye na familia yake heri kwa siku zijazo na wakaongeza kuwa, "kila mtu katika Manchester United anabakia kulenga kuendeleza maendeleo ya timu chini ya Erik ten Hag na kufanya kazi pamoja kuleta mafanikio uwanjani."

Kwa upande wa taarifa kutoka fowadi huyo alieleza kuwa, "Kufuatia mazungumzo na Manchester United tumekubaliana kwa pamoja kumaliza mkataba wetu mapema," ilisema taarifa ya fowadi huyo.

"Ninaipenda Manchester United na ninawapenda mashabiki, hilo halitabadilika kamwe. Hata hivyo, ninahisi kama wakati mwafaka kwangu kutafuta changamoto mpya.Naitakia timu kila mafanikio kwa kipindi kilichosalia cha msimu huu na kwa siku zijazo."

Katika mahojiano yake na TalkTV hivi karibuni, Ronaldo alisema alihisi amesalitiwa na klabu huku akitoa mtazamo wake kwa kocha Erik Ten Hag kuwa, alihisi analazimishwa kuondoka katika klabu hiyo.

Wakati huo huo, Ronaldo alisema hajaona mabadiliko yoyote katika klabu hiyo tangu meneja wa zamani Sir Alex Ferguson alipostaafu mwaka 2013.