NA DIRAMAKINI
RAIS wa Shirikisho la Soka Barani Afrika (CAF), Patrice Motsepe ametangaza rasmi kuanzishwa kwa mashindano mapya ya kimataifa yatakayojulikana kama African Nations League.
Picha na Mtandao.
Mashindano haya ya kisasa yanalenga kuongeza ushindani, kuboresha kiwango cha soka la Afrika na kuvutia uwekezaji katika sekta hiyo.
Kwa mujibu wa Motsepe, African Nations League yatakuwa na muundo mpya ambao utachukua nafasi ya michuano ya sasa ya CHAN (Michezo ya Mataifa ya Afrika kwa wachezaji wa ligi za ndani).
Lengo kuu la mashindano haya ni kuleta ushindani wa kiwango cha juu zaidi, ambapo timu bora kutoka bara la Afrika zitashiriki, ikiwemo wachezaji wa viwango vya juu wanaocheza katika ligi kuu za kimataifa na zile za ndani ya bara la Afrika.
Motsepe amefafanua kuwa, African Nations League itakuwa na mifumo miwili tofauti, yaani African Nations League Continental.
Huu utakuwa mfumo wa kanda ambapo timu bora kutoka kila ukanda wa Afrika zitashindana, na hatimaye washindi watapata nafasi ya kufika kwenye hatua ya fainali, ambayo itafanyika katika nchi mwenyeji.
Mfumo huu utaongeza ushindani wa kikanda, na kutoa fursa kwa timu za mataifa mbalimbali kushiriki na kuonyesha vipaji vyao.
Pia, kutakuwa na African Nations League Pan-African ambapo mfumo huu utakuwa wa kitaifa na utajumuisha timu bora kutoka bara lote la Afrika.
Mashindano haya yatakuwa na muundo unaofanana na AFCON (Michuano ya Mataifa ya Afrika), ambapo timu za mataifa mbalimbali zitachuana, huku wachezaji wa viwango vya juu kutoka ligi kuu duniani wakiingia uwanjani.
Hii itawawezesha wachezaji bora wa Afrika kutoka ligi kubwa duniani kushindana na wenzao wa Afrika kwa ajili ya ubingwa wa bara.
Motsepe amesema kuwa,African Nations League inalenga kukuza vipaji vya wachezaji wa Afrika na kuongeza ushindani, jambo litakalosaidia kuinua kiwango cha soka katika bara la Afrika.
Aidha, amesema kuwa,mashindano haya yanatarajiwa kuwa kivutio kikubwa kwa wawekezaji wa kimataifa, na hivyo kuleta maendeleo ya kiuchumi kwa sekta ya soka barani Afrika.
"Kwa kuanzisha mashindano haya, tunalenga kuongeza nguvu ya kiuchumi katika soka la Afrika, huku tukijenga mazingira bora kwa wachezaji wetu," amesisitiza Motsepe.
Rais huyo wa CAF amefafanua kuwa, Shirikisho la Soka la Afrika linaendelea na mazungumzo na Shirikisho la Kimataifa la Soka (FIFA) pamoja na wadau wengine muhimu ili kuhakikisha kuwa ratiba ya mashindano ya kimataifa inaendana na michuano ya African Nations League bila kuathiri ligi za ndani, ambazo tayari zina ratiba yenye msongamano wa mechi.
Mashindano haya mapya yanatarajiwa kuleta sura mpya katika soka la Afrika na kuongeza hadhi ya michuano ya kimataifa ya bara hili.
Wachezaji na timu za Afrika sasa watapata jukwaa kubwa la kimataifa, na mashindano haya yanatarajiwa kuwa na athari kubwa kwa kukuza kiwango cha michezo ya soka na kupanua upeo wa ushindani katika bara la Afrika.
Kwa ujumla, African Nations League inatoa ahadi ya kubadilisha ramani ya soka barani Afrika, ikitazamia kuwa na mafanikio makubwa katika kipindi kijacho.