Mashindano ya Klabu Bingwa Taifa ya Ngumi 2026 yashika kasi jijini Tanga

NA DIRAMAKINI

MASHINDANO ya Klabu Bingwa Taifa ya Ngumi 2026 yameingia katika hatua ya robo fainali, huku mabondia kutoka klabu mbalimbali nchini wakionesha ushindani mkali katika mapambano yaliyofanyika jijini Tanga.

Kwa mujibu wa taarifa iliyotolewa na Shirikisho la Ngumi Tanzania (BFT), jumla ya mapambano 17 yalipangwa katika hatua hiyo Agosti 25,2026 huku baadhi yakimalizika kwa ushindi wa pointi, TKO na RSC, wakati mengine yakikosa kufanyika kutokana na wapiganaji kutofika ulingoni.

Katika pambano la kwanza, Muhsini Hassani wa Mgulani alifanikiwa kumshinda Japhet Gita wa Band Coy kwa pointi 3-2, katika pambano lililokuwa na ushindani mkubwa.

Pambano la pili kati ya Faki Faki wa Jeba na Ally Hamisi wa G/Chande halikufanyika na liliwekwa katika kundi la walkover.

Katika pambano la tatu, Hussen Issa wa Ngome alipata ushindi dhidi ya Omary Masoka wa Tanga kwa RSC, huku Mwalami Salum wa MMJKT akimshinda Yusuf Abdulaman wa Band Coy kwa pointi 3-2 katika pambano la nne.

John Yombayomba wa Ngome naye aliendeleza ushindani kwa kumshinda Kurwa Jumanne wa Makolola kwa TKO katika pambano la tano.

Katika pambano la sita, Hamisi Mtwale wa Magereza alitoka na ushindi wa pointi 3-2 dhidi ya Hassani Lugana wa G/Chande.

Ushindi mwingine wa pointi ulipatikana katika pambano la saba, ambapo Issa Ernesti wa Magereza Chuo alimshinda Baraka Mrisho wa Mkinga kwa pointi 5-0.

Katika pambano la nane, Credo Peter wa MMJKT alimshinda Maope Kajolo wa Band Coy kwa pointi, huku Hassani Selemani wa Jeba akipata ushindi wa walkover dhidi ya Babu Ally wa G/Chande.

Pambano la kumi kati ya Peter Maula wa Handeni na Rashid Bakari wa Mgulani, pamoja na pambano la kumi na moja kati ya Charles Robert wa Makolola na Rajabu Yahaya wa Jeba, hayakufanyika kutokana na walkover.

Katika mapambano yaliyofuata, Ibrahimu Malungu alimshinda Ibrahimu Ramadhani kwa pointi, huku Mashauri Malongo pia akitajwa kuwa mshindi dhidi ya Ibrahimu Ramadhani katika pambano lililofuata.

Shafii Mbaraka wa MMJKT alifanikiwa kumshinda Babually Wendo wa Tanga kwa pointi, wakati David Julias wa Band Coy alipata ushindi wa TKO dhidi ya Salum Hamza wa Mkinga.

Katika pambano la 16, Ally Rashid wa Tanga alimshinda Juma Athumani wa Handeni kwa pointi. Pambano la mwisho lilimshuhudia Abadallah Mfaume wa Ngome akimshinda Mohamed Juma wa MMJKT kwa pointi.

Matokeo hayo yanaonesha ushindani unaoendelea kuimarika katika Mashindano ya Klabu Bingwa Taifa ya Ngumi 2026, huku mabondia wakiwania nafasi ya kusonga mbele katika hatua zinazofuata za mashindano hayo.

Shirikisho la Ngumi Tanzania (BFT) limeendelea kusimamia mashindano hayo kwa kushirikisha klabu kutoka maeneo mbalimbali nchini, ikiwa ni sehemu ya kuendeleza na kukuza mchezo wa ngumi Tanzania.