Stanbic Bank yarahisisha malipo ya bidhaa China kwa Shilingi ya Tanzania

DAR-Wafanyabiashara wa Tanzania wanaoagiza bidhaa kutoka China sasa wanaweza kufanya malipo kwa wazabuni wao kwa kutumia Shilingi ya Tanzania na fedha hizo kubadilishwa moja kwa moja kuwa Yuan ya China, hatua inayolenga kupunguza gharama na kurahisisha miamala ya biashara kati ya nchi hizo mbili.

Huduma hiyo mpya, inayowezesha malipo ya moja kwa moja kutoka Shilingi ya Tanzania kwenda Yuan ya China bila kupitia Dola ya Marekani ilikuwa miongoni mwa masuala yaliyojadiliwa katika Jukwaa la Biashara Tanzania na China lililoandaliwa na Stanbic Bank Tanzania na kufanyika katika Ukumbi wa Diamond Jubilee, Dar es Salaam.

Jukwaa hilo liliwakutanisha wafanyabiashara kutoka Tanzania, wawakilishi wa kampuni na biashara kutoka China, pamoja na taasisi za serikali na sekta binafsi, kwa lengo la kujadili fursa za kukuza biashara, uwekezaji na ushirikiano wa kiuchumi kati ya Tanzania na China.

Kwa wafanyabiashara wanaoagiza bidhaa kutoka China, utaratibu huo unatarajiwa kupunguza hatua katika mchakato wa malipo na kuwasaidia kudhibiti gharama zinazoweza kujitokeza kutokana na mabadiliko ya viwango vya ubadilishaji wa fedha.

Mfanyabiashara kutoka Dar es Salaam, Lulu Kheri amesema, huduma hiyo inaweza kuwa na manufaa makubwa kwa wafanyabiashara kwa kuwa inagusa changamoto zinazohusiana na gharama za miamala na mabadiliko ya viwango vya fedha.

“Kinachotuhusu sisi wafanyabiashara ni kiwango cha kubadilisha fedha, gharama na uhakika kwamba mzabuni wetu atapokea malipo yake. Huduma hii inarahisisha mchakato na inaweza kusaidia kulinda faida yetu,”amesema Kheri.

Huduma hiyo ya malipo ya moja kwa moja kutoka Shilingi ya Tanzania kwenda Yuan ya China ilizinduliwa Agosti 12, 2026 na inawezeshwa kupitia mfumo wa Cross-Border Interbank Payment System (CIPS) unaotumika kuwezesha malipo ya kimataifa yanayohusisha Yuan.

Kwa kutumia utaratibu huo, mfanyabiashara wa Tanzania hahitaji kupitia hatua ya kubadilisha Shilingi kuwa Dola ya Marekani kabla ya fedha hizo kubadilishwa tena kuwa Yuan. Hatua hiyo ya ziada inapunguzwa, hivyo kutoa nafasi ya kupunguza gharama na kurahisisha mchakato wa malipo kwa wafanyabiashara.

Akizungumza katika jukwaa hilo, Fredrick Max, Mkuu wa Idara ya Biashara wa Stanbic Bank Tanzania amesema, huduma hiyo imeanzishwa kwa kuzingatia changamoto ambazo zimekuwa zikikabili wafanyabiashara wanaofanya biashara na China.

“Kwa muda mrefu, wafanyabiashara walilazimika kubadilisha Shilingi kuwa Dola za Marekani na baadaye kuwa Yuan. Huduma yetu ya moja kwa moja ya Shilingi kwa Yuan inaondoa hatua hiyo ya ziada, na kuwasaidia wateja kuokoa muda, kusimamia gharama na kufanya miamala kwa ufanisi zaidi,”amesema Max.

Amesema,huduma hiyo ni sehemu ya juhudi za benki hiyo kusaidia biashara zinazohusisha Tanzania na China, akieleza kuwa Stanbic Bank Tanzania, kupitia mtandao wa Standard Bank Group na ushirikiano wake wa kimkakati na Industrial and Commercial Bank of China (ICBC), inaendelea kuwaunganisha wafanyabiashara na fursa za kibiashara katika masoko ya nchi hizo mbili.

Kwa mujibu wa Max, ushirikiano huo pia unalenga kuwasaidia wafanyabiashara wa Tanzania kupata wazabuni wanaoaminika nchini China, pamoja na kuwawezesha kufikia wanunuzi na washirika wa kibiashara katika soko la China.

Mjadala katika jukwaa hilo pia ulijikita katika namna Tanzania inavyoweza kuongeza manufaa yatokanayo na biashara na China, hususan kwa kuongeza uzalishaji na mauzo ya bidhaa zenye thamani iliyoongezwa.

Alfred Ngelula, Mkuu wa Dawati la China kutoka Tanzania Investment and Special Economic Zones Authority (TISEZA) amesema, kupungua kwa gharama zinazotokana na ubadilishaji wa fedha kati ya Shilingi na Yuan kunaweza kuongeza ushindani wa Tanzania katika kuvutia wawekezaji kutoka China.

Kwa upande wake, Benson Nkini, Afisa Biashara Mwandamizi wa Tanzania Trade Development Authority (TanTrade) alisisitiza umuhimu wa Tanzania kuongeza mauzo ya bidhaa zilizoongezwa thamani katika soko la China, badala ya kutegemea zaidi mauzo ya bidhaa ghafi.

Hatua hiyo, alisema, inaweza kusaidia kuongeza thamani ya biashara kati ya Tanzania na China na kuongeza manufaa ya kiuchumi kwa wazalishaji na wafanyabiashara wa Tanzania.

Mbali na huduma za malipo, Stanbic Bank Tanzania imekuwa ikishiriki katika kuwaunganisha wafanyabiashara wa Tanzania na fursa za kibiashara nchini China, ikiwa ni pamoja na kuwapeleka baadhi ya wateja wake kwenye China International Import Expo (CIIE) kwa miaka minne mfululizo.

Maonesho hayo yanayofuata yanatarajiwa kufanyika Novemba 2026, yakitoa fursa kwa wafanyabiashara wa Tanzania kukutana moja kwa moja na wanunuzi, wazalishaji na washirika wengine wa kibiashara kutoka China.

Kwa mujibu wa taarifa zilizotolewa katika jukwaa hilo, wafanyabiashara wanaotaka kutumia huduma ya malipo ya moja kwa moja ya Shilingi kwa Yuan wanaweza kupata huduma hiyo kupitia matawi ya Stanbic Bank Tanzania. Wateja waliopo pia wanaweza kutumia njia za kidijitali baada ya kukamilisha taratibu zinazohitajika.

Huduma hiyo inatajwa kuwa hatua nyingine katika kurahisisha miamala ya biashara kati ya Tanzania na China, wakati ambapo uhusiano wa kibiashara na uwekezaji kati ya nchi hizo mbili ukiendelea kupanuka.