NA DIRAMAKINI
JESHI la Polisi nchini Malawi limewakamata viongozi wawili waandamizi wa Kampuni ya Taifa ya Mafuta ya Malawi (NOCMA), wakituhumiwa kuhusika katika uhamishaji wa fedha unaodaiwa kuwa wa kifisadi wenye thamani ya zaidi ya Dola za Marekani 400,000 (Shilingi bilioni 1.07 za Kitanzania).
Picha na Mtandao.
Fedha hizo zinadaiwa kuhamishwa kwenda nchini Msumbiji kwa ajili ya kugharamia huduma za upakiaji na uondoaji wa shehena za mafuta katika bandari za Beira, katikati mwa nchi hiyo na Nacala iliyopo Kaskazini mwa Msumbiji.
Kwa mujibu wa Naibu Afisa Mkuu wa Uhusiano wa Umma wa Jeshi la Polisi la Malawi (MPS), Alfred Chimthere amesema, viongozi waliokamatwa ni Miklas Reuben mwenye umri wa miaka 54 ambaye ni Naibu Mkurugenzi Mtendaji wa NOCMA na Thokozani Jacob Sesani mwenye umri wa miaka 49, ambaye ni Meneja Mwandamizi wa Uendeshaji.
Taarifa hizo, zilizonukuliwa na gazeti la Nyasa Times zinaonesha kuwa,wawili hao ni miongoni mwa maafisa wenye nyadhifa za juu zaidi katika uongozi wa NOCMA.
Chimthere amesema,watuhumiwa hao wanaweza kufunguliwa mashtaka yanayohusiana na uzembe wa mtumishi wa umma katika kulinda fedha, matumizi mabaya ya madaraka ya umma pamoja na makosa mengine yanayohusiana na tukio hilo.
Kwa mujibu wa polisi, fedha zinazochunguzwa zilihamishiwa kwenye akaunti inayodaiwa kuwa ya kampuni ya Moniray Mozhandlings Lda, huku muamala huo ukielezwa kuwa ulikusudiwa kulipia gharama za upakiaji na uondoaji wa shehena za mafuta katika bandari za Beira na Nacala.
Polisi wamesema,uchunguzi bado unaendelea ili kubaini mazingira kamili yaliyopelekea fedha hizo kuhamishwa pamoja na iwapo kuna watu wengine waliohusika katika tukio hilo.
Chimthere amesema,watuhumiwa hao wanatarajiwa kufikishwa mahakamani hivi karibuni, huku uchunguzi ukiendelea.
Kukamatwa kwa viongozi hao kunatajwa kuwa hatua muhimu katika uchunguzi wa kashfa ya fedha iliyotikisa NOCMA baada ya kampuni hiyo kukiri kuwa ilikuwa imeangukia katika utapeli uliotekelezwa kwa njia ya kisasa.
Aidha,kwa mujibu wa taarifa zilizotolewa kuhusu tukio hilo, wahalifu walidaiwa kuingilia mawasiliano ya barua pepe yaliyokuwa yakifanyika kati ya NOCMA na mtoa huduma halali, kisha kuwasilisha taarifa za benki zilizoghushiwa kwa kujifanya kuwa ni mwakilishi wa mtoa huduma huyo.
Mbinu hiyo iliwezesha fedha hizo kuhamishwa kwa kutumia taarifa za benki zilizodaiwa kuwa halali, kabla ya kugundulika kuwa muamala huo ulihusishwa na udanganyifu.
Kukamatwa kwa Reuben na Sesani sasa kunazua maswali kuhusu namna udhibiti wa ndani wa NOCMA ulivyofanya kazi, hatua zilizochukuliwa kabla ya fedha hizo kuhamishwa na iwapo kulikuwa na uzembe au ushiriki wa maafisa wengine katika mchakato huo.
Wakati watuhumiwa hao wakisubiri kufikishwa mahakamani, macho yanaelekezwa kwenye hatua zinazofuata za uchunguzi na iwapo polisi watawakamata au kuwafungulia mashtaka watu wengine.
Mamlaka pia zinatarajiwa kujaribu kubaini mtandao mzima uliotumika katika udanganyifu huo, chanzo cha taarifa za benki zilizotumika, pamoja na namna zaidi ya Dola 400,000 za Marekani zilivyoweza kuhamishwa kutoka katika mfumo wa fedha wa kampuni hiyo.
Kesi hiyo pia imeibua mjadala kuhusu umuhimu wa kuimarisha mifumo ya uthibitishaji wa miamala ya kifedha na usalama wa mawasiliano ya kielektroniki katika taasisi za umma, hasa pale miamala mikubwa ya fedha inapohusisha kampuni na huduma zinazovuka mipaka ya nchi.(NA)