NA DIRAMAKINI
KLABU ya Young Africans SC (Yanga SC) imeendelea kushikilia nafasi ya kwanza katika msimamo wa Ligi Kuu ya NBC Tanzania Bara msimu wa 2025/2026 baada ya kucheza michezo 12 na kujikusanyia jumla ya pointi 32.
Kwa mujibu wa takwimu za msimamo wa ligi hiyo, Yanga imefanikiwa kushinda michezo 10 na kutoka sare mara mbili bila kupoteza hata mchezo mmoja.
Timu hiyo pia imeonesha ubora mkubwa katika safu ya ushambuliaji kwa kufunga mabao 30 huku ikiruhusu mabao mawili pekee, hali inayowapa tofauti ya mabao 28.
Nafasi ya pili inashikiliwa na JKT Tanzania wenye pointi 28 baada ya kucheza michezo 17, wakishinda michezo saba, kutoka sare saba na kupoteza michezo mitatu. Wamefanikiwa kufunga mabao 18 na kufungwa mabao 15.
Katika nafasi ya tatu ipo Azam FC yenye pointi 27 baada ya kucheza michezo 13, ikishinda michezo saba na kutoka sare sita bila kupoteza. Azam imefunga mabao 21 na kuruhusu mabao manne pekee, ikiwa na tofauti ya mabao 17.
Simba SC inashika nafasi ya nne ikiwa na pointi 27 baada ya kucheza michezo 12, ikishinda michezo nane, kutoka sare tatu na kupoteza mchezo mmoja. Simba imefunga mabao 20 na kufungwa mabao matano.
Katika nafasi ya tano ipo Pamba Jiji yenye pointi 24 baada ya michezo 15, ikifuatiwa na Namungo FC, Dodoma Jiji na Mtibwa Sugar ambazo zote zina pointi 21 lakini zikitofautiana kwa idadi ya mabao ya kufunga na kufungwa.
Timu ya TRA United ipo nafasi ya tisa ikiwa na pointi 19, sawa na Singida Black Stars walioko nafasi ya kumi.
Nafasi ya kumi na moja inashikiliwa na Mashujaa FC wenye pointi 17 huku Coastal Union na Fountain Gate wakiwa na pointi 15 kila mmoja katika nafasi ya 12 na 13 mtawalia.
Katika eneo la hatari la kushuka daraja, Mbeya City ipo nafasi ya 14 ikiwa na pointi 13, ikifuatiwa na Tanzania Prisons wenye pointi 13 pia lakini wakiwa na tofauti ndogo ya mabao. Mkiani mwa msimamo huo ni KMC FC yenye pointi 8 baada ya kucheza michezo 16.