Ethiopia imepiga hatua kubwa kilimo cha umwagiliaji mahindi-Waziri Mkuu Ahmed

NA DIRAMAKINI

SERIKALI ya Ethiopia imeendelea kuonesha mafanikio makubwa katika sekta ya kilimo, hususan katika maendeleo ya umwagiliaji wa zao la mahindi, hatua inayotajwa kuwa nguzo muhimu katika kufikia usalama wa chakula nchini humo.

Akizungumza hivi karibuni, Waziri Mkuu wa Ethiopia, Dkt.Abiy Ahmed alibainisha kuwa, juhudi zinazofanywa na serikali katika kuboresha uzalishaji wa mazao ya kilimo zinaanza kuzaa matunda, ambapo miradi ya umwagiliaji wa mahindi imepata mafanikio makubwa na ya kutia moyo.

Kwa mujibu wa kiongozi huyo, matokeo ya utekelezaji wa mpango huo yanaonesha wazi kuwa Ethiopia ipo katika njia sahihi kuelekea kujitosheleza kwa chakula.

Alisisitiza kuwa,mafanikio hayo si ya bahati mbaya, bali ni matokeo ya uwekezaji makini katika miundombinu ya umwagiliaji pamoja na sera madhubuti za kilimo.

Aidha, Waziri Mkuu huyo alieleza kuwa, hatua hiyo ni ishara tosha kwamba ndoto ya muda mrefu ya kuifanya Ethiopia kuwa taifa linaloweza kujilisha lenyewe inakaribia kutimia.

Alitaja mafanikio hayo kama sehemu ya mkakati mpana wa serikali wa kuhakikisha wananchi wanapata chakula cha kutosha bila kutegemea misaada ya nje.

Serikali ya Ethiopia imekuwa ikiimarisha juhudi zake za kufanikisha uhakika wa chakula kupitia miradi ya umwagiliaji, ikiwa ni pamoja na kuendeleza mafanikio yaliyopatikana katika uzalishaji wa ngano kwa misimu ya kiangazi na masika.

Mkakati huo unalenga kuongeza tija ya kilimo mwaka mzima, kupunguza utegemezi wa mvua zisizotabirika, na kukuza uchumi wa wakulima.

Wataalamu wa kilimo wanaona kuwa iwapo kasi ya utekelezaji wa miradi hiyo itaendelea kudumishwa, Ethiopia inaweza kuwa mfano wa kuigwa barani Afrika katika jitihada za kufikia uhuru wa chakula kupitia kilimo cha umwagiliaji.Hatua hizi zinatarajiwa kuleta mageuzi makubwa si tu katika uzalishaji wa mazao, bali pia katika ustawi wa jamii na maendeleo ya uchumi kwa ujumla nchini Ethiopia.(NA)