NA DIRAMAKINI
RAIS wa Urusi, Vladimir Putin amesema kuwa vita vinavyoendelea kati ya Urusi na Ukraine vinaonekana kuelekea ukingoni, akionesha matumaini mapya ya uwezekano wa kufikiwa kwa makubaliano ya amani baada ya zaidi ya miaka minne ya mapigano makali yaliyoitikisa Ulaya Mashariki.
Picha na PPD.
Akizungumza na waandishi wa habari mjini Moscow kufuatia maadhimisho ya Siku ya Ushindi, Putin amesema anaamini kwamba, mzozo huo “unakaribia mwisho,” akisisitiza kuwa kuna dalili za kuongezeka kwa mazungumzo ya kidiplomasia kati ya pande zinazohasimiana.
Kauli yake imekuja sambamba na mapendekezo ya mazungumzo mapya ya usalama barani Ulaya pamoja na uwezekano wa mikutano ya ngazi ya juu na uongozi wa Ukraine, iwapo makubaliano ya msingi yatafikiwa.
Kwa mujibu wa taarifa mbalimbali za vyombo vya habari vya kimataifa, Putin ameeleza kuwa, Urusi iko tayari kushiriki katika mazungumzo ya amani ya muda mrefu, huku akipendekeza pia uwezekano wa mkutano na Rais wa Ukraine, Volodymyr Zelensky, katika nchi ya tatu endapo masharti ya makubaliano yatakamilika.
Hata hivyo, kauli hizo zimekuja katika kipindi ambacho mapigano bado yanaendelea katika maeneo kadhaa ya mstari wa mbele, huku Ukraine ikihituhumu Urusi kwa kuvunja makubaliano ya kusitisha mapigano ya muda mfupi yaliyopendekezwa hivi karibuni.
Wachambuzi wa masuala ya kisiasa wanasema, kauli ya Putin inaweza kuwa ishara ya mabadiliko ya mwelekeo wa vita hivyo, lakini pia wanatahadharisha kuwa hali bado ni tete kutokana na tofauti kubwa za kisera na kiusalama kati ya pande zote mbili.
Vita vya Urusi na Ukraine vilianza mwaka 2022 na vimesababisha maafa makubwa ya kibinadamu, uharibifu wa miundombinu na mgawanyiko mkubwa wa kisiasa duniani, huku juhudi mbalimbali za kidiplomasia zikiendelea kutafuta suluhu ya kudumu.(NA)