NA MWANDISHI MAALUM, OR- TAMISEMI
NAIBU Katibu Mkuu (Afya) Ofisi ya Rais Tawala za Mikoa na Serikali za Mitaa,Dkt. Grace Magembe amesema kuanzia sasa ukaguzi wa bidhaa za afya kitakuwa ni moja ya kiashiria cha ufanisi kwa Waganga Wakuu wa Mikoa na Halmashauri.
Ameyasema hayo Machi 3,2022 alipofanya ukaguzi wa ubora wa utoaji wa huduma za afya katika Halmashauri ya Gairo na Mvomero mkoani Morogoro ulioambatana na ukaguzi wa miradi ya ujenzi wa miundombinu ya kutolea huduma ya afya inayoendelea kutekelezwa.
Dkt. Grace amesema kuwa, kutofanyika kwa ukaguzi wa dawa na bidhaa za afya kunaweza kuchangia upotevu na matumizi mabaya ya bidhaa za afya ikiwemo dawa, vitendanishi na vifaa tiba.
Amesema, kazi ya ukaguzi wa bidhaa za tiba sasa lazima ifanyike kwa ushirikiano kati ya Idara ya Afya na Wakuu wa Idara nyingine wakiwemo wakaguzi wa ndani.
Amemuagiza Mkurugenzi wa Halmashauri ya Wilaya ya Mvomero kwa kushirikiana na Mganga Mkuu wa Mkoa wa Morogoro kufanya ukaguzi wa bidhaa za afya kwenye Hospitali ya Wilaya ya Mvomero na kuwasilisha taarifa kwa Katibu Mkuu Ofisi ya Rais-TAMISEMI ndani ya siku saba kufuatia ukaguzi wa awali kuonesha kuna bidhaa ambazo takwimu zake hazikuwa na uhalisia
Aidha, amemuelekeza Mkurugenzi huyo kuanza mara moja ujenzi wa jengo la wagonjwa wa dharura (EMD) na kumtaka Mhandisi wa Halmashauri kutoa utaalam wa kiufundi wa namna bora ya kuweka mifereji ya kuondoa maji yanayotuama katika eneo hilo.