ZANZIBAR-Rais wa Jamhuri ya Muungano wa Tanzania,Dkt. Samia Suluhu Hassan amemhamisha Mhandisi Maryprisca Winfred Mahundi kutoka Wizara ya Maji kwenda kuwa Naibu Waziri wa Wizara ya Habari, Mawasiliano na Teknolojia ya Habari.
Pia,Mheshimiwa Rais Dkt.Samia amemteua Zainab Athuman Katimba kuwa Naibu Waziri wa Nchi, Ofisi ya Rais - Tawala za Mikoa na Serikali za Mitaa (TAMISEMI).
Mheshimiwa Katimba anachukua nafasi ya Deogratius John Ndejembi ambaye ameteuliwa kuwa Waziri wa Nchi, Ofisi ya Waziri Mkuu (Kazi, Vijana, Ajira na Wenye Ulemavu).
Vile vile,Rais Dkt.Samia amemteua Daniel Baran Sillo kuwa Naibu Waziri wa Mambo ya Ndani ya Nchi.
Mheshimiwa Sillo anachukua nafasi ya Jumanne Abdallah Sagini ambaye amehamishwa kwenda kuwa Naibu Waziri wa Wizara ya Katiba na Sheria.