NA DIRAMAKINI
SAFARI ya Tanzania katika Kombe la Mataifa ya Afrika (AFCON) 2025 imefikia kikomo katika hatua ya Raundi ya 16 Bora, baada ya Taifa Stars kupoteza kwa bao 1-0 dhidi ya wenyeji Morocco katika mchezo uliochezwa jijini Rabat.
Matokeo hayo ya Januari 4,2026 yalihitimisha safari iliyobeba matumaini makubwa kwa Watanzania, waliokuwa wakisubiri kwa muda mrefu kuona timu ya taifa ikivuka hatua ambayo kwa miaka mingi imekuwa kikwazo katika historia ya soka la nchi.Licha ya kucheza ugenini dhidi ya moja ya mataifa yenye nguvu zaidi kisoka barani Afrika, Taifa Stars ilionesha kiwango cha ushindani kilichozidi matarajio ya wengi.
Katika Uwanja wa Prince Moulay Abdellah, Tanzania ilicheza kwa nidhamu ya hali ya juu, ikionesha utulivu, mpangilio mzuri wa kiufundi na ujasiri wa kupambana badala ya kujilinda.
Aidha,Stars iliweza kuhimili mashambulizi ya Morocco kwa muda mrefu na kuwalazimisha wenyeji kucheza kwa tahadhari kubwa.
Uchezaji huo uliashiria mabadiliko chanya katika mtazamo na uwezo wa timu ya taifa kukabiliana na presha ya mechi kubwa.
Hata hivyo, pengo kati ya ushindani na ushindi lilijitokeza katika eneo la umaliziaji ambapo Tanzania ilipata nafasi kadhaa muhimu za kufunga, lakini ilishindwa kuzitumia ipasavyo, hali iliyoruhusu Morocco kutumia uzoefu wake na kupata bao lililoamua hatima ya mchezo.
Kwa ujumla, kuondolewa kwa Taifa Stars hakufuti maendeleo yaliyooneshwa katika michuano hiyo.
Badala yake, AFCON 2025 imeacha ishara wazi kuwa soka la Tanzania linaendelea kukua na lina msingi wa kushindana katika ngazi ya juu barani Afrika.
Ingawa safari hii imefikia mwisho, uzoefu uliopatikana na taswira ya uchezaji uliodhihirishwa vinaweka msingi wa matumaini mapya kwamba Tanzania bado ina nafasi ya kuandika historia tofauti katika mashindano yajayo.