NA DIRAMAKINI
SHIRIKA jipya la usafiri wa anga la Raila Airways lililoanzishwa na mjasiriamali na mwanamitindo Mkenya anayeishi Singapore, Sheila Mutundi limetangaza kuwa,maandalizi ya kuanza shughuli zake rasmi yanaendelea vizuri huku uzinduzi wa safari zake ukitarajiwa kufanyika ndani ya mwaka 2026.
Usimamizi wa shirika hilo umeeleza kuwa, hatua muhimu tayari zimefikiwa, ikiwemo upatikanaji wa ndege ya kwanza ambayo itatumika kuzindua safari za masafa marefu mara baada ya kukamilika kwa taratibu zote za kisheria na kiutendaji zinazohitajika katika sekta ya usafiri wa anga.
Tofauti na mashirika mengi ya ndege yanayoanza kwa kutoa huduma za ndani kabla ya kupanua mtandao wake wa safari za kimataifa, Raila Airways imechagua mkakati tofauti wa biashara kwa kuelekeza nguvu zake moja kwa moja kwenye safari za kimataifa.
Kwa mujibu wa mpango wa awali wa kampuni hiyo, shirika hilo linatarajia kuanzisha safari za moja kwa moja kati ya Nairobi na Malaysia mara mbili kwa wiki.
Hatua hiyo inatajwa kuwa sehemu ya mkakati wa kuimarisha ushirikiano wa kiuchumi, biashara na utalii kati ya mataifa ya Afrika Mashariki na Asia ya Kusini-Mashariki.
Wadau wa uchumi wanaeleza kuwa, kuanzishwa kwa safari hizo kunaweza kusaidia kurahisisha usafirishaji wa wafanyabiashara, wawekezaji na watalii, huku pia kukiongeza ushindani katika sekta ya usafiri wa anga ambayo imeendelea kukua kwa kasi katika miaka ya hivi karibuni.
Sheila Mutundi amenukuliwa akisema uamuzi wa kulitumia jina la “Raila Airways” ulitokana na mashauriano ya kina yaliyofanyika kati ya viongozi wa kampuni na wawekezaji wake.
Amesema,wawekezaji waliona kuwa jina hilo lina nguvu ya kutambulika kwa urahisi katika maeneo mengi ya Afrika kutokana na ushawishi wake wa muda mrefu katika nyanja mbalimbali za kijamii, kisiasa na kiuchumi barani humo.
Tangazo la kuanzishwa kwa Raila Airways tayari limezua mjadala mpana miongoni mwa wadau wa sekta ya usafiri wa anga, huku wengine wakiliona kama hatua inayoweza kuongeza ushindani na kuboresha huduma kwa wasafiri wa kimataifa wanaotumia njia za Afrika Mashariki.
Hata hivyo, wachambuzi wa sekta hiyo wanaeleza kuwa,mafanikio ya shirika hilo yatategemea uwezo wake wa kukamilisha taratibu zote za udhibiti wa usafiri wa anga, kupata vibali vinavyohitajika katika masoko ya kimataifa pamoja na kujenga mtandao imara wa kibiashara utakaoihakikishia kampuni hiyo ushindani endelevu.
Kadri mwaka 2026 unavyosonga mbele, macho ya wadau wengi wa sekta ya anga yataendelea kuelekezwa kwa Raila Airways ili kuona namna litakavyotekeleza mipango yake na kuingia rasmi katika soko la usafiri wa anga la kimataifa ambalo lina ushindani mkubwa, lakini pia lina fursa nyingi za ukuaji.