DAR-Kamanda wa Polisi Mkoa wa Kipolisi Temeke Kamishna Msaidizi mwandamizi wa Polisi, SACP Kungu John Malulu Agosti 3,2026 amefanya mazungumzo na Katibu wa Viongozi wa Amani wa wilaya ya Temeke Mchungaji Titus Kiyame.
Kamanda Malulu amesema, lipo jukumu kubwa la kulinda na kuimarisha amani kwa nguvu kubwa katika makundi yote ndani ya jamii na Jeshi la Polisi linafanya hivyo, lakini viongozi wa dini wana jukumu kubwa.
Aidha, Mkuu wa Polisi Jamii wa Mkoa huo Kamishna Msaidizi wa Polisi ACP Emma Foya amemwambia Mchungaji kuwa katika Kitengo cha Polisi Jamii ipo miradi mingi ambayo kimsingi ni madarasa ya uponyaji na ualimu juu ya umuhimu wa kuilinda na kuitetea kwa nguvu kubwa amani iliyopo.
Naye Mchungaji Titus ambaye ni Katibu wa Viongozi wa Amani Temeke ameshukuru kwa kikao hiko kizuri kilicholenga kuboresha zaidi ushirikiano baina yao na ameahidi yote waliyoyazungumza watayafanyia kazi ili Temeke na nchi nzima kwa ujumla amani itamalaki.